பேரங்காடியும் (mall) நமக்கு ஒரு சுற்றுலா தளம் தான்
வேடிக்கையை முடித்துவிட்டு
வழக்கத்தின் முடிவில் உணவக விடுதிகளில்
கால்கள் விடுப்பு எடுத்துக்கொள்ள சொல்லி
அடம்பிடித்தது, கூடவே மகளும்..
KFC வரிசையில் நானும் ..
வாழையிலை விரித்து
விருந்தோம்பல் செய்த நமது
வர்த்தக உணவகங்களை
உலகமயமாக்களில் தொலைத்துவிட்டு
இப்போரது வரிசையில் நிற்பது கொடுமை ..
ஒரு டுடோரியல் மாணவனை போல
உணவின் பெயர்களை மனப்பாடம் செய்துகொண்டேன்..
உணவே மருந்து என்று கூவி கூவி
கற்பித்தவனை, கற்றறிந்த எவரேனும்
கடக்க நேரிடுமோ என்ற கவலை வேறு ..
இருப்பதிலே விலைகுறைவான
இரண்டை தேர்வு செய்துகொண்டு,
KFC வரிசையில் நானும் ..
அவன்வேக வேகமாய் எதோ என்னிடம் கேட்க நானும்
ஆமாம் என்று சொல்லி தொலைக்க..
சிரித்தபடியே என்னிடம்
இருமடங்காய் பணத்தை கட்ட சொல்ல
மறுப்பதற்கு அவகாசம் இல்லாத
அந்த KFC வரிசையில் நானும்..
அதிகமான சீஸையும் ,
குடிக்க தகுதியில்லாத குளிர்பானத்தையும்
என் தலையில் கட்டியது தெரியவந்தது
மீசையில் மண் ஒட்டினாலும்
ஆரம்பத்தில் இருந்த கம்பீரத்தோடு
யாரோ எவரோ என்று கிளம்பு ஆரம்பித்தோம்
கொள்ளையர்கள் வறுத்த கோழியின்
( KFC) கடையிலிருந்து