உள்ளூர் பேருந்து பயணம் (கிராமத்து) (ரூட் பஸ் டவுன் பஸ் அவரவர் வட்டாரத்திற்கு ஏற்ப பெயர்கள் பல)
தற்செயலாகவோ தானாகவோ என் விருப்பமாய் அவ்வப்போது அமையும்!
பள்ளி கல்லூரி இருபாலர் நிறைந்த பலவகையான பயணிகளுடன்! பெறுவது தருவது கற்பது பார்ப்பதும் அனுபவமே !
பருவம் நிறைந்த இருபாலரும் பார்வை போராளிகளாய் !
பலருக்கு தேரோட்டம் சிலருக்கு போராட்டம்!
படிவம் மாறாமல் பட்டிக்காட்டு காதல்களம் உயிர்ப்போடு இருக்கிறது!
இருபது ஆண்டுகளுக்கு முன் என் பெங்களூரு நண்பி ஒப்பந்த அடிப்படையில் காதலிக்க ஒப்புக்கொண்டது உதட்டின் ஓரமாய் உறுத்தல் புன்னகையை வரவழைத்தது !
மஞ்சள் பூசிய நடுத்தர வயது பெண் நடத்துனருடன் நடத்திய உரையாடல் பின்னணியில்
தீராத உடலா தேன்சிந்தும் கூடலா மம்முட்டியின் மவுனம் சம்மதம் பாடல் ஓடிக்கொண்டிருந்தது!
இளையராஜாவின் இசை பின்னணி இன்னமும் இன்பசூழல் இழையோடச்செய்தது !
என்னருகில் இடமிருந்தும் அமரமறுத்த அந்த மூதாட்டிக்கு வேறு வழியில்லாமல் எழுந்து நின்றேன் அவ்வளவு கூச்சம் !
மேற்க்கூரை இடித்து நின்றவனை ஏரெடுத்து நோக்கியது
ஐந்து கண்கள்
ஐந்து என்ன கணக்கு? ஓரப்பார்வையை ஒன்றில் தானே சேர்க்கவேண்டும் !
பாட்டியையும், ஹேர் டையையும் நன்றியோடு நினைத்துக்கொண்டேன்!
என்னை மறந்து சுற்றம் மறந்த ஒரு குழந்தையின் குதுகூலத்தைப்போல நிறைவான பயணம் !